Nous commancerons de plus belle,
Compere on nous la baille belle,
Sçait tu bien qu’on a fait la Pais
Qui nous perdra pour vn jamais,
Vne Paix pour vne autre guerre,
Et remis en main le tonnerre,
De celui qui nous a frappez,
Ainsi nous serions attrappez,
Nous ni pourrons prendre les armes
Soit pour exceds, soit pour alarmes,
Sinon par les commandemens
Du Mazarin où de ses gens,
L’on lui a fait la reuerence
Auec la demarche en cadence,
Chacun ayant à qui mieux mieux
Composé sa mine & ses yeux,
C’est vn conte à ma mere Loye
L’on prendroit Paris pour vne Oye,
Où si tu veux pour des Oysons,
Il nous vient de biens à foizons,
Et les Postes sont comme libres
Pour les hommes & pour les viures,
Tant par Corbeil que par S. Clou,
C’est pour mieux riuer nostre Clou,
Ce sont de petite amorces
Pour nous faire oublier nos forces ;
Il a signé apres Gaston,
Pardieu si i’auois vn bâton,
Et que ne fussions pas compere
Ie te traicteroient comme vn here,
Il a signé apres Gaston ?
Quoy ce malhereux Phaeton,
Qui n’attend que son precipice
Se remettroit encor en lice,
Sçache que nous sommes perdus,
Et que quelqu’vn nous a vendus,

Page précédent(e)

Page suivant(e)