l’authorité de la Cour, & dudit sieur Prince de Conty,
mesme de crier hautement dans la ruë, le peuple se seroit
assemblé à sa clameur, & en ayant apris le sujet,
auroit supplié ledit Marquis de la Vieuuille de rendre
audit Courrier lesdits pacquets, ce que n’ayant voulu
faire, ledit peuple irrité de l’iniure faite audit Courrier,
se seroit saisi de la personne dudit Marquis de la
Vieuuille, & l’auroit à main forte chassé hors dudit
Rheims, & quoy que ledit peuple n’ait fait autre chose
que ce qu’il a creu estre obligé par le zele qu’il a au seruice
du Roy, & l’obeïssance qu’il doit aux Arrests de
la Cour, qui ne luy permettoient pas de souffrir plus
long temps le commandement d’vn homme, qui est
la creature de celuy qui est declaré ennemy de l’Estat,
& perturbateur du repos public : Neant moins aucuns
des principaux Magistrats de ladite ville de Rheims,
preferans quelque interest ou esperance particuliere,
au seruice du Roy, à l’obligation du serment qu’ils
ont fait en la Cour, & à l’amour de la patrie & de
leurs Concitoyens ont enuoyé à Saint Germain les
noms des principaux dudit peuple qui ont assisté à
l’expulsion dudit Marquis de la Vieuuille pour auoir
commission de leur faire leur procés souuerainement
& en dernier ressort, & entr’autres celuy dudit Roland
& des autres Supplians. Ce qui a obligé ledit
Roland de se retirer en cette ville pour demander à
la Cour sa protection, tant pour luy que lesdits autres
Supplians, requerant estre receus appellans de
toute la procedure qui pourroit auoir esté faite contre

Page précédent(e)

Page suivant(e)