& le soin de leur salut. Son amour a des secrets
que nous ne pouuons pas penetrer, & son cœur des
transports pour les hommes qui nous sont entierement
cachez. Mais, Madame, pour ce qui est du
Caresme dont vostre Conscience est choquée à cause
que l’on y mange de la viande. Ie vous diray qu’il est
à propos de vous donner là-dessus vne parfaite instruction
de ce que vous en deuez croire, & Chrestiennement
& en bonne Catholique. Sçachez, Madame,
que le Ieûne est de droit Diuin, & que dés la
naissance du monde il a esté commandé de Dieu. En
effet dés l’instant mesme que l’homme fut formé de
ses mains, & que ce Chef-d’œuure de la Nature eut
eu pour son appartement & son domicile la demeure
du Paradis Terrestre, Dieu luy ordonna le Ieûne, &
de tous les fruits dont il auoit permission de manger,
sa Majesté se reserua celuy de l’Arbre de vie, afin de
luy faire connoistre que ses soûmissions deuoient
commencer par l’abstinence. Si nous en croyons au
Rabbi Salmon, le Ieûne fut pratiqué du temps de
Noël, & dans l’Arche qui flottoit sur les eaux, les
hommes aussi bien que les animaux y pratiquerent
l’abstinence pour se garentir du Deluge. Comme
Moyse estoit la figure du Fils de Dieu, ses actions
estoient aussi les viues images des siennes, & ce Prophete
aymé du Ciel ieuna l’espace de quarante iours,
à l’imitation de celuy, qui en nous preschant les veritez
de l’Euangile nous a aussi presché l’establissement
du Ieusne Si nous en croyons à l’histoire Sainte tous
les Prophetes nous ont publié le Ieusne, & si nous

Page précédent(e)

Page suivant(e)