dans le mesme crime : Qu’ils puissent entrer dans cette grande
Chambre pour y prononcer des Arrests contre nostre
auctorité, où autrefois elle estoit receuë avec tant de
veneration. Qu’ils se représentent vne fois, que ceux qui
ont tenu leurs places si dignement, ont choisi plustost
l’exil & la prison, que de manquer à leur devoir, & à l’obligation
de servir leur Roy. Mais ils ne se sont pas contentez
de se soustraire de nostre obeyssance : ils ont travaillé
par leurs caballes d’en tirer ceux qui estoyent les plus
obligez par leur naissance, & par le rang qu’ils tiennent
dans le Royaume à nous honorer, & à nous servir. Nous
voulons dire le Prince de Conty, qui avoit grand suject de
demeurer reüny à la Maison Royalle par l’exemple de nostre
tres-cher, & tres amé Cousin le Prince de Condé son-frere,
qui continuë de plus en plus de faire paroistre par
ses signalez services, le zele qu’il a pour la grandeur de
nostre Couronne, & qui s’employe avec tant de génerosité
pour la deffendre contre les attentats de nos sujets
rebelles. Le Duc de Longueville se devroit souvenir, que
les grands honneurs, & le rang qu’il possede dans nostre
Royaume, ont esté la recompence des services de ses ancestres
qui avoyent soustenu si valeureusement & avec tant
de courage l’honneur & la dignité de cette Couronne.
Enfin c’est vne chose bien extraordinaire, de voir que ceux
qui portent des titres si honnorables, & des dignitez qui
leur ont esté concedées par les Roys nos predecesseurs &
nous, comme vne marque de leurs merites, par vne submission
qui ne peut avoir de nom pour son excez, reçoivent
de la main de nos Officiers factieux le commandement
des armes que l’on leve contre nous. Qu’ils considerent
& se representent la conduite de nostre tres cher,

Page précédent(e)

Page suivant(e)