VN Bourgeois de Paris, qui n’est ny de qualité, ny
d’âge à porter les armes, & qui d’ailleurs n’a pas
assez de biens de fortune pour fournir vn homme,
comme les autres ; enuoye ce Soldat à sa place. Quoy qu’il
ne soit armé que de papier & de plume, il pourra passer
à la môntre, & rendre quelque seruice. Nous ne manquons
pas d’hommes, Dieu mercy, & nous auons plus de
bras que nos persecuteurs : Il est seulement question de les
animer à bien faire, & de perseuerer constamment dans
la defense d’vne si iuste cause, & cette feüille pourra contribuer,
si ie ne me trompe, quelque chose à vn si bon effet.