admirons la grandeur de Dieu, par l’excellence des Ministres de sa
Iustice ; & considerons que s’il veut empescher l’entrée du Paradis
terrestre, il y commet vn Cherubin auec vn glaiue de feu : & s’il
veut exterminer vn peuple entier, vn Ange en a le cõmandement :
s’il donne le choix à vn Roy, des fleaux dont il le veut affliger, il
depute vn Prophete : Et quand il veut dépeupler vn peu le monde,
il arme quelque main puissante, & suscite des Heros pour cét effet.
Ainsi ie pense que dans les desordres du temps, le plus expedient
est de parler auec modestie de ceux qui les font, & de rendre graces
à Dieu, de ne nous auoir pas choisis pour vn employ si contraire
à la douceur de nos sentimens. Les desolations publiques estans
periodiques & fatales, ont leur saison & leur necessité comme les
autres choses : si elles nous rencontrent en leur chemin, suiuons
auec plaisir le decret immuable de l’ordre du monde. La resistance
& l’afflictions d’esprit est vn murmure secret contre la Prouidence ;
Offrons-nous à elle volontairement, quand elle aura dressé nôtre
bucher, & nous couronnerons par nôtre soûmission la victime qui
luy doit estre immolée.