auoit enchaisnées de telle sorte, qu’il les faisoit agir
selon les mouuements de son esprit : on n’eût sceu dire
dans le progrez de sa vie, voila vne action de prudence,
en voila vne de justice ; Celle-là de vaillance ;
celle-là d’humanité ; elle-là de douceur ; celle-là de
magnificence, mais tout ce qu’il faisoit sembloit estre
meslé & composé de toutes les vertus ensemble, decerpebat
summitates ex singulis virtutibus ; Et comme le Sage
des Stoïques, il n’agissoit iamais qu’il ne les fist agir
toutes ensemble ; pour former le tableau de sa vie, il
en sçauoit mesler industrieusement toutes les couleurs,
il les faisoit regner alternaiuement.

Messieurs ; ne vous y trompez pas, il n’y a que la
seule vertu, qui puisse faire les grands Heros, quelque
authorité, quelque puissance qu’vn homme possede,
il est petit, s’il est vitieux, ostez-luy la vertu
vous le trouuerez petit en toutes choses. Il est petit
en ses dons, car il est auare ; il est petit en ses trauaux,
parce qu’il est delicat ; il est petit en sa Religion enuers,
Dieu, parce qu’il est superstitieux ; il est petit enuers
les bons, parce qu’il est enuieux ; il est petit entre les femmes,
à cause qu’il est vitieux, Et si la fortune l’esleue
à quelque eminente dignité, ce n’est que pour le faire
paroistre plus petit, pour le descouurir, pour le descrier,
& pour le deshonorer dauantage.

Mais Messieurs, quoy que les vertus que le DVC
DE COLIGNY auoit acquises, fussent grandes deuant
les hommes ; elles estoient nulles deuant Dieu,
tandis qu’il a vescu dans l’erreur ; il n’y a point de vertu