Duval, Jean [?] [1652], LA TROISIESME PARTIE DV PARLEMENT BVRLESQVE. DE PONTHOISE, Contenant la Response à l’Anti-Burlesque du sieur D. L. R. Et le nom & les qualitez de trois nouueaux Renegats. Par l’Autheur de la premiere & seconde Partie. , françaisRéférence RIM : M0_2701. Cote locale : B_15_38.
LA TROISIESME PARTIE DV Parlement Burlesque de Ponthoise. Contenant la Responce à l’anti-Burlesque du sieur D. L. R. Et les noms & les qualitez de trois nouueaux Renegats. Par l’Autheur de la premiere & seconde Partie.
Estron sorty du cul des Muses ! Le plus sot de toutes les buses ! Meschant rapetasseur de Vers ! Esprit bas ! esprit de trauers ! Mangeur des chardons du Parnasse ! Corbeau qui fadaises croasse ! Plus pezant que n’est vn sommier ! Insecte engendré du fumier Du cheual qu’on nomme Pegaze ! Bref le plus infect viedaze Qui iamais au monde parut ! Des bestes mesme le rebut !
Qui t’a fait auoir l’insolence ? De menacer de la potence Celuy, dont les plus beaux esprits Admirent les gentils escrits. Tu t’es donné beaucoup de peine, Et mis ta ceruelle à la gesne, Pour rimailler si sottement, Et medire si lourdement, Par impertinences si fades, Du plus illustre des malades : Quoy ! luy reprocher qu’il est gueux ! Crochu contrefaict, monstrueux, Qu’il est vne viuante vlcere, Et son corps remply de misere : Penses-tu par là faire tort A ce langoureux ? dont la mort Ne pourra pas ternir la gloire, Et dont l’eternelle memoire, Malgré tes frenetiques vœux, Passera iusqu’à nos nepueux. Faut apprendre à ton ignorance, Que dans la plus grande souffrance, Dans le corps le plus mal construit, Tousiours la belle ame reluit.
Mais toy ! qui n’es qu’vn franc yvregne, Qui pour enluminer ta trogne De vins blancs & de vins clairets Furettes tous les Cabarets ; Tous les deffauts que tu reproches A cet impotent aux mains croches, Ne sont que des deffauts du corps Qui n’attaquent que le dehors : Ton ame infecte & vermouluë Est mille fois plus conompuë, Que de ce malade la peau, Qui n’est rien qu’vn simple fourreau D’vn esprit, qu’vn chacun confesse, Le modelle de gentillesse.
Encor maudir reformateur ! Malautru versificateur ! Qui merites que l’on t’assomme, Pourquoy t’addressera cet homme ? Est tu certain qu’il a produit La piece qui fait tant de bruit :
Duval, Jean [?] [1652], LA TROISIESME PARTIE DV PARLEMENT BVRLESQVE. DE PONTHOISE, Contenant la Response à l’Anti-Burlesque du sieur D. L. R. Et le nom & les qualitez de trois nouueaux Renegats. Par l’Autheur de la premiere & seconde Partie. , françaisRéférence RIM : M0_2701. Cote locale : B_15_38. |