Hostel-Dieu la somme de quatre cens mil liures,
que ma grande Niepce sera tenuë de bailler & deliurer
entre les mains de Messieurs les Administrateurs
& Recteurs dudit Hostel-Dieu à leur premiere
requisition, à condition que tous les passans
de Sicile, bien qu’ils soient en bonne santé, y seront
receus & nourris durant quinze iours.

Ie veux & entends qu’au commencement de ce
present Codicile soit escrit ce vers,
Fronte capillata occasio vertice calua.

Et que l’on adiouste foy à toutes les copies de
mesme qu’à l’original.

Ie supplie tres-humblement ces grands personnages
du tres-illustre Parlement de me vouloir
pardonner, & particulierement monsieur de Brusselles
à qui ie suis tres-obeïssant seruiteur ; ie luy
faits present d’vne montre d’horloge, enrichie de
diamans & d’autres pierres precieuses, l’asseurant
que ie n’ay point d’autre plus grand desplaisir
dans le monde que celuy de l’auoir offensé.

Le present Codicile a esté faict en presence de
Monsieur le Chancelier, & de plusieurs tesmoins
signez dans l’original, le septiesme iour de Mars
mil six cens quarante neuf.