espée de Damas, dont la garde est de fin or, enrichie
& semée de rares pierres precieuses.

Ie prie & conjure Monsieur le Mareschal de la
Motte-Audancourt de vouloir oublier le mauuais
traitemẽt que ie luy ay fait, & de me pardonner :
L’enuie que j’auois d’auoir la Duché de Cardonne,
& de faire feu mon frere Vice-Roy de Catalogne,
estoient les motifs qui me suggeroient
des inuentions pour le faire detenir dans le Chasteau
de Pierre-en-Seize de Lion, ie luy donne de
grand cœur vne Rose de Diamant, dont les Messieurs
de Barcelonne me firent vn present à ma
premiere arriuée du prix de cinquante mille escus.

Ie donne à la Sorbonne cent mille escus que
j’ay à Rome dans le Mont de Pitié : mais ie veux &
entends que le reuenu de cette somme soit employé
pour seruir de subuention à des pauures
estudiants.

Les Poëtes de cette tres-fameuse ville de Paris,
pour recompense de tant de vers qu’ils ont eu
faits à ma loüage, agréeront le present que ie leurs
faits de mon Hostel, ou i’entends qu’ils demeureront,
& lequel ils ne pourront vendre ny alliener
pour quelque raison que ce soit : Au contraire, seront
tenus d’y receuoir tous les autres Poëtes
François durant vn mois : Et les Estrangers, Grecs,
Latins & Italiens quinze iours tant seulement ; Et
pour ce sujet, ils jouyront du reuenu de cinquante