de misericorde : Helas ! ne faites pas en vn coup tant
de playe sur celuy qui a tant receu d’honneurs & de
bien-veillance : ne faites point verser tant de sang, ne
permettez pas que l’on face trois sepulchres en vn
mesme lieu, n’enterrés point auec moy mes parens qui
ne viuent que de ma vie, differez pour le moins le iour
de mon supplice iusques au trespas de mon pere, vous
me trouuerez plus propre à la rigueur de la iustice
quand i’auray rendu le deuoir de la nature à ce bon
vieillard : Ie vous en coniure (ADMIRABLE ET VERTVEVX
SENAT) par les larmes que ie respans à vos
pieds, par les genoux de la Iustice que i’embrasse comme
l’autel des miserables, par la blanche & chenuë
vieillesse de mon pere, par celle du vostre s’il est encor
en vie, par l’amour que vous portés à vos freres.
Helas ! ayés pitié de l’innocence, attendés vn peu
que la verité luy fasse iour au trauers de ces nuages :
jettés vous plutost sur le reste que ie n’ay peu esloigner
sans bruit, qui est dans le Palais que i’ay abandonné,
lequel d’orenauant est destiné pour le fidele
seruiteur du Roy, Monseigneur d’Audencourt, & le
protecteur du peuple affligé sans raison. Et vous nosterés
rien à mon pere si vous luy rendés Iules Mazarin ;
qu’il arriue de la sorte, les François n’ont que
cette teste qui leur empesche le repos : C’est pourquoy
ie deteste, que, Exibit spiritus meus, & reuertetur in terram
suam in illa die peribunt omnes cogitationes.