Il fist refleurir ce qu’il y auoit de plus languissant
& de plus sec dans l’ame de vos sujets. Il perça
ce long espace de terres qui nous separe du siege de vostre
Empire, & vint éclairer iusques à l’obscurité de
nos ombres & de nos cauernes. Il entra mesme dans
les lieux de douleur & de desespoir, & fut cause du
bon interuale qui arresta la vie sur les levres de ceux
qui mouroient.

Apres vne si salutaire apparition nous ne vismes
plus de suites dans nostre perte. Nous pleurasmes vn
grand Roy, mais nous ne trouuasmes point à dire son
gouuernement. Le Soleil ne se coucha que pour se leuer.
Les fantosmes du raisonnement humain disparurent,
& la fausse prudence se cacha. Les cœurs effrayez
oserent se rasseurer. Le peuple commença à prendre
courage. Ie parle, Madame, du courage que vous luy
donnastes.

Sans doute le progrez répondra au commencement ;
la lumiere nous amenera la chaleur. Les esperances
meuriront, & le courage deuiendra force ; mais
on va par degrez & par aages à la perfection de la force ;
la maturité des choses a besoin de la patience des
hommes, & le releuement de tant de pieces renuersees
n’est pas l’ouurage d’vn iour, ny le coup d’essay
d’vn artisan.

Que sert-il de le dissimuler ? la felicité publique est
encor l’obiet de nos vœux & de nos soupirs. Elle n’est
pas encor arriuee. On ne passe pas si viste d’vn contraire
à l’autre : mais elle doit arriuer. Mais elle ne sera pas
longue à venir, ou toutes les belles apparences sont
menteuses, & tous les bons presages sont faux.