des Traitres pour le bien & le salut de vostre
patrie.

Vos Conquestes, Messieurs, eussent esté
inombrables, si l’on n’en eust pas traversé le
cours, & si l’on vous eut permis de poursuivre
vos victoires, le Throsne de la France que
l’on a voulu ébranler se fut restably au point
de son ancienne splendeur, & eut recouvert
sa premiere gloire.

Toute la France à present vous convie d’embraser
sa défence, & mettre en effet les bonnes
intentions que vous luy avez tousjours témoignées :
puis que asseurément vous ne pouvez
trouver vne plus juste occasion, que celle
que l’affermissement de nostre Monarchie
vous offre. Tous les fidelles Sujets s’y emploient ;
les Ennemis voyans la Iustice de nostre costé,
semblent seconder nos entreprises, pour avoir
part à vne si glorieuse action ; & Dieu mesme
qui veut estre de la partie vous force tacitement
à embrasser vne si fameuse rencontre.

C’est icy, Messieurs, c’est icy ou vostre naissance
vous appelle, c’est icy ou vostre vertu vous
convie, ou vostre génerosité vous engage, &
ou l’exercice que vous professez doit faire voir
que le calme des desordres ne se doit qu’à vôtre
conduite.