Le 19. le Roy donna à disner au C. M. à Pontoise,
lequel prist congé de leurs Majestez & de
toute la Cour, & partit auec 500. Cheuaux,
alla coucher proche de Gonnesse. Le lendemain
fut traitté par Guenegaut au Fresne, d’où
il fut coucher à Meaux, & ainsi il prend la toute
de Rethel. Et le mesme iour le Roy partit
pour Compiegne & coucha à Liencour.

Monsieur le Prince fit detacher sur la minuict
du Lundy au Mardy 800. Cheuaux, auec
commandement de marcher nuict & iour sans
s’arrester que pour prendre leur nourriture :
Quelques-vns ont creu qu’ils deuoient aller à
la poursuite du C. M. mais on a reconnu que
c’estoit pour aller secourir Mouron, qui est
pressé par le Comte dé Palluau.

Il y a nouuelles de Champagne du 15. du
courant, qui portent que les Lorrains sont és
enuirons de Reims, tenans la Campagne, sans
pouuoir entrer dans les Bourgs & Villages les
Paysans s’estans amassez & fortifiez, aymant
mieux abandonner leurs Moissons, que de voir
violer leurs femmes & leurs filles.

Monsieur le Prince fit commandement le
19. à 1500. Cheuaux d’aller à Beine, qui est vne
maison du Mareschal de l’Hospital, proche de
S. Preüil, sur le chemin de Dreux. Cette maison