de son affection & fidelité ; à quoy
le Roy ayant demeuré quelque temps, leur
respondit, qu’il sçauoit bien qu’il auoit
quantité de bons & fidelles Subjets en sa
ville de Paris, mais aussi qu’il estoit bien informé
qu’il y en auoit plusieurs ligueurs &
mal affectionnez à son seruice, dont il sçauroit
bien tirer les noms afin de reconnoistre
les vns & les autres ; que quand à la seureté
de la ville de Paris, il y auoit pourueu par
l’ordre qu’il auoit donné aux Bourgeois de
faire garde à leurs portes, & parce qu’il
auoit plusieurs autres choses à leur dire, il
leur feroit plus amplemẽt sçauoir sa volonté
& sa response à leurs remonstrances qu’il
leur enuoyeroit par escrit.

Apres cette response, lesdits sieurs Deputez
de la ville, reprirent le chemin de Paris,
oû ils se rendirent le mesme iour sur les huit
heures du soir.

De cette response, ie laisse à juger sur
quelle conjecture se fondent ceux, qui portant
toutes les choses au pis, & prenant ombrage
de tout, publient malicieusement,
ou sans raison, que le dessein de la Cour &
du Conseil, est de perdre & ruiner cette ville