RESPONSE DV ROY A
Messieurs du Parlement.

IE remercie vostre Compagnie du soin
que vous m’asseurez qu’elle apporte à
maintenir mon authorité : mais parce
que i’ay beaucoup de choses à vous dire au
sujet de vos remonstrances, ie seray bien
aise d’y faire response par écrit, que ie vous
ennoyeray au premier iour.

Le lendemain Mardy septiéme May,
Messieurs les Deputez de la ville de Paris
partirent dans huict carrosses, pour presenter
aussi leurs remonstrances à Sa Majesté,
lesquelles tendoient presque à mesme fin
que celles de Messieurs du Parlement ; & en
outre portoient que toute cette ville estoit
dans vn deüil incroyable, tant de se voir si
long-temps priuée de la presence de Sa Majesté,
que des desordres & dommages qu’elle
souffroit à raison des troupes, qui tous les
iours faisoient incursions iusque dans les
Fauxbourgs, & pilloient tous ceux qui sortoient
de ladite ville, & concluoient par
les supplications qu’il plût à Sa Majesté de
retourner en sa ville de Paris, & d’estre asseuré

Page précédent(e)

Page suivant(e)

---

Anonyme [1652], LA RESPONSE DV ROY FAITE AVX REMONTRANCES de Messieurs du Parlement & de la ville de Paris. Auec l’offre faite à Son Altesse Royale par les Bourgeois de ladite ville, d’entretenir douze mille hommes à leurs despens. Et l’asseurance de sadite Altesse de l’approche du Duc de Lorraine pour le secours de Paris. , françaisRéférence RIM : M0_3439. Cote locale : B_8_46.

---