d’vne autre liberalité aux despens de sa Majesté,
en faisant restablir la diminution qu’on
auoit accordé de faire sur les entrée, afin d’indemniser
les habitans du grand nombre des
pertes qu’ils auoient faites pendant qu’il leur
faisoit la guerre.

Et cependant qu’il leur fait ces grandes offres
& qu’il leur rend ces insignes témoignages
de son amitié, il ne laisse pas de chercher
les occasions de les faire mourir de faim, en
donnant grande quantité de passe-ports qu’il
fait expedier de toutes parts, pour enleuer les
grains hors de France, en faueur de Garand
& de Cantarini, qui luy auoit donné la somme
de huict cens mille liures pour ce bel affaire.
Mais il a beau les amadoüer par ses fourberies,
les parens, les alliez, les amis & les creatures
de Messieurs les Princes ne laissent pas de luy
brasser mille desordres. Les Frondeurs d’vn
autre costé ne laissent pas aussi de conspirer
contre luy & de minuter sa perte. Miserable
Politique pourras tu resister à tant d’ennemis
que le Ciel te suscite ? Tes raisons d’Estat seront
elles assez puissantes pour batre tous ces
esprits en ruine, & pour perdre des partis qui
sont capables de faire sousleuer toute l’Europe
contre ton Eminence ? Bon Dieu qui te
pourra appuyer contre des forces si redoutables ?