s’en doiuent prẽdre qu’à eux seuls pour auoir esté la cause de
la dissipassiõ des Finãces, pour raison de laquelle ils meritent
auec justice la perte de leurs aduances ; D’AILLEVRS le
gain de la derniere bataille arriué dans le temps de cette reformation,
a fait voir que Dieu benissoit les actions du Parlement,
& il faut s’asseurer qu’il continuera ses benedictions
pour faire reüssir ses intentions, lesquelles ne vont qu’au
bien de l’Estat, à la conseruation de l’authorité Royale, & à
la gloire du Roy & du Royaume.

Enfin toutes les Ligues & Traittez cy-deuant faits
en France n’ont point de rapport auec cette deffence,
elle n’a point d’exemple dans l’Histoire, & tous
ces Traittez ont eu leurs interests particuliers détachee
de celuy du Roy & du Royaume : Mais le Parlement
ne peut auoir d’autres interests que celuy du
Roy & de la France, pour maintenir sa puissance
& authorité Royale contre des Fauoris, comme
le Cardinal Mazarin qui l’vsurpe insolemment,
pour establir sa tyrannie ; il ne peut auoir autres
desseins que la conseruation de l’Estat pour maintenir
les peuples dans leurs immunitez & franchises,
rendre au Royaume cette ancienne felicité de nos
Peres, & le restablissement de son ancienne & entiere
liberté.