déja les Deputez s’estoient rendus au lieu destiné
pour empescher le souleuement des peuples &
esteindre le feu qui semble menacer nostre France
d’vn embrasement general, comme l’on se vit
tout à coup rejetté du port en pleine mer par l’arrogance
outrecuidée du Cardinal, qui eut bien la
hardiesse de se presenter deuant ceux desquels il ne
peut attendre que sa condamnation. Ce fut vn
tourbillon, à vray dire, qui pensa tout renuerser,
mais qui tomba sur la teste de son autheur pour
auoir esté sans effet à l’endroit de ceux contre lesquels
il auoit esté excité : car la probité des Deputés
des Cours souueraines n’eust pas plustost seruy
d’obstacle à sa temerité, & donne vn iuste refus à
l’ambition & au desir qu’il auoit d’entrer en leur
assemblée, qu’il se vit en mesme temps descheu
de sa gloire & de son authorité premiere. En effet
il commença tellement à perdre son credit deslors
qu’il se rencontra des Courtisans assez hardis pour
paroistre en sa presence le chappeau sur la teste
sans aucun scrupule. Il se trouuera peut estre des
personnes qui reuoqueront cecy, en doute seulement,
de peur que cela ne soit ainsi, mais i’espere
qu’ils ne seront pas long temps sans en voir les effets ;
Au reste c’est vne verité qui ma esté mandée
par vn de ses Gentilshommes mesme, qui pour

Page précédent(e)

Page suivant(e)