visite, si les peuples l’ont fuy autant qu’vn estranger.
O Conseil barbare ; O tyrannie inouye ! O parricides
trompeurs qui ostans l’honneur que les peuples doiuent
rendre à leur Roy par vos cruelles maximes, le
mettez en hazard de perdre sa Couronne & sa vie ! O
François, iusques à quand balancerez vous sans resolution
de tirer vostre Prince hors de captiuité. Certainement
sa Majesté doit estre respectée. Mais quand elle
est possedée par des trompeurs, c’est vn grand respect
d’honneur qu’on luy fait, quand on l’en retire sans tant
de formalitez, & de pretendu respect.

Or pour reprendre la suitte des années climateriques.
Ie dis qu’en tout cas qu’il arriue changement, ce
ne doit estre pourtant en autre genre de gouuernement
en France, s’il faut auoir égard à la subiection
que les Prouinces de la terre ont aux Astres, & signes
Celestes.

Dautant que s’il est vray que la France est du Trigon
du Belier, Lion, & Sagittaire, signes Celestes masculins,
dont les Seigneurs & gouuerneurs sont Mars &
Iupiter, le Soleil comme Souuerain qui a son exaltation
au Belier, & son throsne Royal au Lion, elle tient
tousiours le gouuernement du Soleil, qui est seul
Souuerain Roy & Monarque entre les Astres.

De plus comme la France est proprement sous le
Sagittaire, signe commun, qui a sa signification sur les
hommes, & particulierement sur les Roys, aussi y est
elle naturellement soubmise par la commune sympathie
de la partie interieure du Sagittaire auec le hommes :
son visage est doux, celste & humain, qui attire
les hommes à le receuoir pour gouuerneur & Seigneur ;
Sonarc, & sa flesche sont ses armes pour les proteger
& deffendre : Sa partie posterieure de cheual est de
force, de vitesse, de generosité, & de seruice pour les
hommes, toutes qualitez necessaires au Prince, & qui
le rendent legitime.

Pour ces causes Alphonse Roy de Castille prefera