Auec ses troupes comme vn foudre
Mit tous leurs escadrons en poudre,
Et les suiuant iusqu’a Douay
Vengea la perte de Courtray :
Chacun [1 mot ill.] sa prouesse,
Tout estoit remply d’allegresse ;
Mais comme en vn beau iour d’Esté
Plein de lumiere & de clarté,
Le Ciel se couurant de nuage
Change le beau temps en orage,
Et des ruisseaux font vne mer :
Nostre plaisir deuient amer,
La ioye en nos cœurs preparée
Ne fut pas de longue duree ;
De tout temps nos Rois tres-pieux
Par vn zele deuotieux
Quand le Ciel a beny nos armes
Et la valeur de nos gendarmes
Vont en cortege solennel
Rendre graces à l’Eternel,
Dedans le Temple où l’on reuere
Le nom de sa tres-chaste Mere.
Les Gardes dés le poinct du iour
Assemblez au son du tambour
Dessus le Pont-neuf se logerent,
Et par les ruës s’arrangerent,
Quand la Reine estant de retour,
Vn bruit s’épand tout à l’entour
Que l’on auoit pris le bon Homme
Que le peuple son pere nomme,
L’vn dit, on l’a mené par là,
L’autre cecy, l’autre cela,
Le murmure eschauffe les biles
Des batteliers gens mal dociles,
Et chacun s’arme aux enuirons
Qui de crocs, & qui d’auirons,
De cailloux, de pics & de peles,
De bans, de treteaux, d’escabelles,
De barres de fer, de leuiers,
De grez que l’on prend aux lauiers.

Page précédent(e)

Page suivant(e)