Aussi tost qu’il monstre la teste,
Chacun son harquebuze preste,
Son mousquet ou son poitrinal
Fait vne salue en general.
Par tout le cry se renouuelle
Vine le Roy, viue Bruxelle,
Quatre cens hommes à l’instant
Le conduisent tambour battant,
Et le promenent par les ruës :
Les chaines furent détenduës,
Tous les tonneaux sont renuersez,
Mais non les soupçons effacez,
Il est conduit en la grand Chambre,
Ses Compagnons furent le prendre :
En suite vn Arrest est donné,
Par lequel il est ordonné
A chacun d’ouurir sa boutique,
Aux Clercs reprendre leur pratique
Mousquets remis aux rateliers,
Les Maçons à leurs attelliers,
Les Charretiers à leurs charettes,
Les Vinaigriers à leurs broüettes,
Les Mareschaux à leurs marteaux,
Porteurs d’eau reprendre leurs seaux,
Les Charpentiers la besaguë,
Et la magnifique Cohuë
Tout doucement se separa,
Chacun chez soy se retira,
A la Cour ainsi qu’à la ville,
Tout parut remis & tranquille,
Chacun reprit sa belle humeur,
Ainsi finit cette rumeur.
Ie ne sçaurois vous faire entendre
S’il y a du feu sous la cendre ;
Mais sans pousser l’affaire à bout
Nostradamus & Dieu sur tout.

FIN.