de Nous : Mais depuis peu nous auons veu des effets
tout contraires aux paroles qui nous auoient esté si solemnellement
portées & que nostre Cour de Parlement
estoit d’autant plus obligée d’obseruer religieusement,
que le respect & l’obeyssance qu’elle nous
doit, la deuoit empescher de ne rien entreprendre
qui nous pûst donner mécontentement. Nous auons
eu grand plaisir de suiure les conseils que l’on auoit
iugez necessaires pour remedier aux desordres que l’on
disoit s’estre formez dans nostre Estat ; Et bien que
la forme que l’on auoit tenuë, nous pûst empescher
de consentir à ce que l’on desiroit de Nous, neantmoins
l’amour que nous auons pour nos Peuples
nous a fait dissimuler le mauuais procedé que l’on
auoit tenu, qui blessoit nostre authorité : Mais à present
que nous auons fait tout ce que nous pouuions
pour le bien de nostre Estat, la dissimulation des entreprises
que nostre Cour de Parlement fait sur nostre
authorité ne pourroit produire autre chose que l’affoiblissement
de nostre puissance & vn mespris de
l’authorité Royalle, par ceux qui sont plus obligez à
la respecter : Ainsi apres auoir consideré combien les
assamblées & les deliberations que nostredite Cour de
Parlement continuë de faire contre nostre volonté,
& contre les ordres précis que nous luy auons donnez,
nous sommes obligez de prendre les voyes que nous
auons iugé necessaires pour en arrester le cours, dont
la continuation pourroit causer de si grands maux à
nostre Estat, sans apporter aucun bien au public : nos
ennemis font assez connoistre le préjudice que nous

Page précédent(e)

Page suivant(e)