Laffemas, abbé Laurent de [?] [1649], PLAINTE DV CARNAVAL, ET DE LA FOIRE S. GERMAIN EN VERS BVRLESQVES. , françaisRéférence RIM : M0_2794. Cote locale : D_2_26.
Pour reuenir donc à mon conte, Plein de colere, & plein de honte ; Ce grand Dieu des Plats, & des Pots Debuta par ces beaux propos. Quoy dans Paris la bonne Ville, Ou i’ay conté plus de cent mille Qui n’aimoient rien que les Festins, Qui dansoient comme des Lutins, Qui se piquoient de Serenades, De Momons, & de Mascarades, Et qui chantoient tant de chansons Dans la ruë, & dans les maisons : Dans ce Paris où les delices Se trouuent dans tous exercices Où les Drilles, & les Filoux. Le soir apres qu’ils estoient soux, De vin, de tabac, & de biere, L’vn deuant, & l’autre derriere, Surprenoient le Bourgeois craintif, Qui se retiroit tout plaintif, Que son manteau l’honneur des Gaules Ne fut plus dessus ses épaules ; Dans Paris où les Cabarets Sont par tout voisins de si prez : Paris où l’on void tant de Garces, De bouffons, de ioüeurs de farces, Où l’on voyoit l’Oruietan, Faire si bien le Capitan Les deux Triuelins, les Machines, Et mille nouueautez badines. Dans Paris où les fils gaillards En dépit des Peres vieillards Menoient la vie delectable, Qui fait sauter du lit à table Couuerte de nape, ou tapis, Pour manger, où pour faire pis : Car c’est pis quand ces testes foles Perdent des mouceaux de Pistoles, Quand trois dez [illisible]ant du cornet Mettent tous leurs coffres à net.
Laffemas, abbé Laurent de [?] [1649], PLAINTE DV CARNAVAL, ET DE LA FOIRE S. GERMAIN EN VERS BVRLESQVES. , françaisRéférence RIM : M0_2794. Cote locale : D_2_26. |
|||||