Les Interests du Temps.
Dans les temps où regne la vertu ou peut iuger des hommes
par leur deuoir, dans les siecles corrõpus, & qui portent
pourtant des gens habiles, on en doit iuger par les interests
dans ceux dans lesquels il se rencontre beaucoup de deprauation
auec peu de lumiere, comme en celuy où nous viuons, il
faut ioindre les inclinations des hommes auec leurs interests,
& faire de ce meslange la regle de nostre discernement. Ie pretends
sur cette maxime rendre iustice à la verité, que l’on enseuelit
plustost que l’on ne l’esclaircit par des raisons assez souuent
chimeriques, apuyées sur des faits tousiours obscurs, & ie
m’imagine que l’on conuiendra aisément, que la mesure dont
ie me sers pour la connoissance de ceux qui sont presentement
sur le theatre, n’est pas la moins certaine.
Si M. le Prince eust bien connu ses interests, il eust esté persuadé
qu’il n’en auoit point dé plus grand au monde, que de viure
selon les deuoirs de sa naissance : s’il eust sceu mépriser de foibles
auantages qu’il tiroit dans les premieres années de la Regence,
par la complaisance qu’il auoit pour le Ministere, il eust
arresté sans peine ce débordemẽt, pour ainsi parler de la faueur
qui a failli d’enseuelir l’Estat, au commencement dans la tyrannie,
& depuis dans la confusion, il ne se fust pas donné la haine
publique par le siege de Paris, & par la protection du C. M. & il
ne se fust pas mis en suite dans la necessité de rompre ce sacré
nœud qui doit vnir la Maison Royale, pour s’oposer à vne puissance
qu’il auoit luy mesme esleué, puis qu’il en auoit souffert
l’excez. Il est donc vray que sa conduite a esté contraire à ses
interests, & ces fautes en ce point ont esté produites par son inclination,
qui l’a porté auec tant de violẽce à de petits ménagemens
peu dignes de sa naissance, qu’elle luy a osté la lumiere
necessaire pour discerner ce qui étoit de ses veritables auãtages
cela suposé, il n’est pas mal aise de connoistre quels sont presentement
les interests de M. le Prince, puis qu’il n’est pas possible
Gondi, Jean-François Paul / cardinal de Retz [?] [1652],
LES INTERESTS DV TEMPS. , français
Référence RIM : M0_1718. Cote locale : C_12_2.