Sa geniture & son mary,
Qui de ce est tres fort marry.
Mais faut appaiser la furie
De Monsieur le ventre qui crie,
Et voudroit bien tant estre goulu
Qu’il ne fust point ventre d’vn Esleu,
Et de telle Magistrature
Ne tirer aucune nourriture,
Se voyant traitter en coquin,
Quoy qu’ils portent soye & satin,
Et iurant s’il n’a dequoy paistre
D’enuoyer au Diable son Maistre,
Qui n’ayant maille ny denier
Tout son saoul le laisse crier.
Iadis faisoient bien autre chere,
Quand y auoit moindre misere,
Car, Manant quand chez eux alloit,
Sous bure porter souloit,
Pour estre rauallé de taille,
Grasse oye, ou bien quelque volaille.
D’autre fois perdrix ou Lapin,
Achepté de son sainct Crespin.
Telle viande estoit cherie
Plus que celle de boucherie,
Que mainte-fois on delaissoit,
Pour le Chappon qui rotissoit.
Mais à present que nul n’apporte
Et que necessité tres forte
Retient le Paysan chez soy,
Pour faire deniers pour le Roy,
Et vendant cheuaux & charuë
Pour subuenir à la grand Cruë
N’ozant s’en venir au marché
De crainte d’y estre accroché
Par sattellites qu’on apposte.
Pour le faire descendre en poste
Dans vn Repaire de Crapaux
A faute de payer son taux.
De la disette du Village
Se sent bien leur pauure mesnage,

Page précédent(e)

Page suivant(e)