de l’entiere administration & absolu gouuernement du
Royaume, qu’ils occupent iniustement & exercent auec
vne extréme tyrannie & oppression, fait assez paroistre
qu’il n’a autre but que la ruine de la Maison de
Bourbon qui reste seule de la Maison Royale, la mort
de nos Princes & en icelle la mutuation & subuersion
de l’Estat.

III.

Nous promettons employer vnanimement tout nostre
pouuoir, nos vies & nos biens pour la conseruation
de ce Royaume, & pour empescher les miserables effeis
de si pernicieux desseins, faire oster l’authorité publique
des mains de son vsurpareur, rendre au Roy la
dignité de sa Couronne, la garder & maintenir en son
entier, tirer sa personne de leurs mains, reparer l’offence
qu’il a faicte, en faisant chastier l’Autheur de cette
violence, & reuocquer toutes les charges & dignitez
données depuis la detention des Princes à ceux qui y
ont participé.

IV.

Et pour remettre l’Estat en sa premiere forme establir
soubs l’authorité souueraine du Roy le Conseil legitime
des Princes du Sang, des autres Princes & Officiers de
la Couronne & des anciens Conseillers d’Estat qui ont
passez par les grandes charges, & ceux qui sont extraits
de grandes maisons & familles anciennes, qui par affection
naturelle & interest particulier sont portez à la
conseruation de l’Estat, a qui de droict durant le bas
aage de nos Roys, & pour leur indisposition, l’administration,
gouuernement, & direction des affaires publiques
est differé par les loix anciennes & fondamentales
du Royaume qui exclusent les femmes & les Estrangers: