Dessus vostre porte, Cy git ;
Cependant qu’en vostre Antichambre
On fumoit le jasmin & l’ambre,
L’Intendant & le cordon bleu
Pestoient ensemble aupres du feu,
Sçachant bien que pour toute affaire,
Soit importante ou necessaire
Vous teniez en main le cornet,
Ou railliez dans le cabinet
Auec Bautru, Lopes & d’autres
Qui sont bien d’aussi bons Apostres
Et deux singes sur vos genoux
Qui dansoient par fois auec vous :
Ce n’est pas viure a nostre mode
Le François à d’autres methodes,
Et vous n’auriez pas fait tant de mal
D’imiter le feu Cardinal,
Dont le discours & le visage
Gaignoient le cœur des plus sauuages,
Donnant au monde tour a tour
Vne audiance châque iour,
Vous deuiez imiter cet homme
Et joindre l’addresse de Rome
A la science qu’il auoit
De Politique & d’homme adroit,
Comme vous auiez la puissance
Et des deniers grande abondance
Vous pouuiez finir nos langueurs
Et par la paix gaigner les cœurs,
Elle n’estoit que trop facile
Grace, au genereux Longueuille
Si vous n’eussiez point trauersé
Ce qu’il auoit bien commencé.