Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3.
Page précédent(e)

Page suivant(e)

-- 34 --


Donc elle crût que ma vaillance
Auroit pû faire resistance.
Vous sçauez entre vous & moy,
Qu’on auoit cessé le biuoy.
Elle ouure à Menelas la porte,
Qui ne manquoit pas de main forte,
Se flattant que par mon trespas,
Elle appaiseroit Menelas :
En vn mot les ennemis viennent,
Ces homicides me surprennent :
Eolide fut mon parrain,
Vous connoissez le pellerin.
Dieux rendez-leurs auec vsure,
Si ma passion à mesure,
Ce que les traistres m’ont presté,
Ou plustost ce qu’ils m’ont osté.
C’est à vous le dé fils d’Anchise,
Qu’Æneas à son tour m’instruise,
Du dessein qu’il a dans ces lieux,
Si c’est par le vouloir des Dieux,
S’il ne s’est point perdu sur l’onde,
Quitté par mesgarde le monde,
Et s’il n’est point par ses malheurs,
Poussé dans ces lieux de douleurs.

 

Biuoy. garde
extraordinaire
quãd l’ennemy
est
proche.

 


Tandis que l’esprit ainsi cause,
L’Aurore dans son char de rose,
Se faisoit ramener du cours,
A voir enfiler leurs discours ;
L’esprit faisant venir des chaises,
Ses valets preparant des fraises,
Il estoit aisé de iuger,
Qu’ils ne pouuoient si tost bouger :
Et ie crois que Messer Enée,
Auroit mis là sa matinée,
Sans la guide qui l’impreuuant,
Luy dit fort bien en se leuant,
Trefue de la ceremonie,
Saluez vostre compagnie,
Vous passeriez icy le iour,
Mais la nuict aduance à son tour :
Vertubleu vous auez à faire
Bien d’autre besogne qu’à braire :
Voyez-vous ce chemin là bas,
Comme il se diuise en deux bras,
Le gauche meine à tous les diables,
Où les damnez sont miserables :
Dieu nous garde de cét endroit :
L’autre chemin qui tourne à droit,
C’est celuy que nous deuons prendre,
Et c’est luy qui pourra nous rendre,
Plus viste au champ Elysien,
Où demeurent les gens de bien.
L’esprit qui void que c’est luy dire,
Ouuertement qu’il se retire,
Dame, ne nous poussez pas tant,
Dit-il, cela n’est pas seant :
Ie m’en vais acheuer le nombre
Des ans qu’il faut que ie sois ombre ;
Pour vous allez maistre Æneas,
Dieu vous garde d’vn pareil cas.
Lors ce courtois esprit s’enuole,
Aussi viste que sa parole.

 

 


Mon Heros ses yeux délegua,
Ou la Sybille a dit aga,
Et vit autre part qu’à la droit,
Dessous vne roche fort droite,
Vn grand lieu rendu regulier,
Par vn esprit particulier ;
C’est vn fort qu’a fait imprenable,
La Mathematique du Diable.
Vn mur, deux murs, puis encore vn,
Ce sont trois murs dira quelqu’vn ;
Disons s’il le veut trois murailles,
Mettent à couuert ses entrailles,
Trois murailles, sont encor peu,
Vn fleuue qui roulle du feu,
Et des roches toutes entieres,
Sert à ce pays de frontieres.
On void la porte de deuant,
Estre presqu’au dessus du vent,
Pour sa hauteur hors de mesure,
Les pilliers sont de pierre dure,
Qu’on casseroit moins aisément,
Qu’on a fait Semestre Normand ;
Et que les Dieux fussent-ils quatre,
N’auroient pas la force d’abattre.
Là Thysiphone sur le seüil,
A iamais ne fermera l’œil,
Meschante ame, bonne Vedette,
Portant sanglante chemisette,
Et le Suisse qui iour & nuit,
Prent garde si quelqu’vn ne fuit.
Page précédent(e)

Page suivant(e)

Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3.