Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3.
L’ENFER BVRLESQVE, OV LE SIXIESME DE L’ENEIDE Trauestie.
Deussay-je passer par les piques D’vn tas d’impertinens critiques, Dont le sçauoir sera picqué Par quelque mot mal expliqué, I’entreprens de chanter Enée, Et commence par la iournée Que le maistre de son vaisseau Palinure fut à van-l’eau.
Au sixiesme de l’Eneide, Maistre Æneas perdit son guide, Et cria d’vn tres-piteux ton, Comme vn aueugle sans baston ; Il dit ce qu’il auoit à dire, Tandis que courrut son nauire A bride abbatuë en la mer, Iugez s’il alloit de bel air : Finalement auprés de Cume, (Ce ne pouuoit estre sans rhume, Car il auoit crié trop fort) Il se vit arriuer au port, Et son cœur nageant dans la ioye Oublia l’homme qui se noye. D’abord on tourna le vaisseau, Et par vn demy cercle en l’eau, La proüe ayant fait volte-face, La pouppe vint prendre sa place, A mesme temps l’anchre ietté Mit tout le monde en seureté : Pas vn ne manqua de besongne, Si l’vn appelle, l’autre cogne, Sur tous vn tas de ieunes gars, Qui sont d’ordinaires égrillards, S’assemble en corps & se rallie Dessus ce bord de l’Italie, Cette jeunesse ne dort pas Quand l’heure approche du repas : De mesme accord ils vont en trouppe Cueillir des herbes pour la souppe, L’on m’a dit que ce fut des choux, L’vn fait du feu de deux cailloux, Et les frottant sur de la méche, Que son camarade desseiche, Ie me doute bien que par fois Le pauure hõme attrappe ses doigts, Vne bande plus esloignée, Tenant en main vne cognée, Court aux forests coupper du bois : Vne autre bande abbit des noix, Quelques-vns questent par la plaine Pour découurir quelque fontaine, I’entends ou fontaine, ou ruisseau : Car pourueu que ce soit de l’eau, Ils se la monstrent tous par signe, Comme estant vn bon heur insigne, Et témoignent par leurs clameurs Que Desbarreaux n’est pas des leurs, Luy qui prend pour mauuais augure Quand il rencontre de l’eau pure.
Mais Enée a bien à songer A d’autres choses qu’à manger,
Laffemas, abbé Laurent de [?] [1649], L’ENFER BVRLESQVE, OV LE SIXIESME DE L’ENEIDE TRAVESTIE, ET DEDIÉE A MADAMOISELLE DE CHEVREVSE. Le tout accommodé à l’Histoire du Temps. , françaisRéférence RIM : M0_1216. Cote locale : C_4_3. |