Anonyme / ou Chauvigny de Blot, Claude de [?] [1649], LA CVSTODE DE LA REYNE QVI DIT TOVT. , françaisRéférence RIM : M0_856. Cote locale : B_4_15.
Ville par trop rebelle escoute mon project, Vn Cheual autre fois perdit la belle Troye : Mais ie sens en mon cœur vne secrette joye, Que c’est assez d’vn Asne pour vn si grand effect.
Iulle que ce discours flattoit en l’asseurant Montra bien que son Asne estoit d’aise rauie, Et se croyant desia Maistre de ma vie, I’entendis que ces mots, il alloit proferant.
Genereux sentiment, que cest ardeur me plaist, Et que i’ayme de voir le soucy qui vous presse, Ceste haute colere est iuste, ma Princesse, Le premier des Loix est le propre interest.
Quittez sans plus tarder ce sejour odieux, Où le respect des Princes passe pour vn grand crime, Où la submission a perdu son estime, Où les plus gens de bien sont les plus factieux.
Les cœurs sont tous portés à la rebellion, Ceux n’aguere qui deuroient d’vne ame plus loyalle Maintenir hautement la puissance Royalle, Pour la destruire mieux font tramer l’Vnion.
C’est Auguste Senat, donc les Diuins Arrests Le rendirent iadis celebre dans l’Europe, Auec vn peuple vil lachement s’enueloppe, Et souffre auec luy de communs interests.
Anonyme / ou Chauvigny de Blot, Claude de [?] [1649], LA CVSTODE DE LA REYNE QVI DIT TOVT. , françaisRéférence RIM : M0_856. Cote locale : B_4_15. |
|||||