Apres toutes vos fourberies
Apres toutes vos voleries
N’esperez pas cher Cardinal
D’y passer d’autre Carnaual.
Vrayment c’est bien vous faire grace
Que de vous laisser quelque place,
Permettant qu’en autre pays
Vous disposiez de nos louys,
I’ay souuent ce mot à la bouche
Mais c’est leur perte qui me touche
Pardonnez le moy s’il vous plait,
Et sans iazer venons au fait
Ne serez vous pas bien à plaindre
Lors que n’ayant plus rien à craindre
Dans quelque lieu de seureté
Vous viurez dans la volupté,
Et ferez de belles dépences,
Soit en parfums, soit en essences,
Sans enuieux, & sans ialoux
Tenant singes sur vos genoux ?
Car icy tousiours quelque affaire
De vos plaisirs vous vient distraire
Tousiours courrier dessus courrier
Vous prie de l’expedier,
Quelque rencontre, quelque attaque
Quelque benefice qui vaque
Quelque aduis par vos espions
Des estrangeres nations,
Quelque partie casuelle,
Vous tiennent tousiours en ceruelle,

Page précédent(e)

Page suivant(e)