auec la suitte de sa belle vie, comme on a fait la mienne, & qu’on
ne demande point sa mort, ou son exil, comme on fait le mien,
encore qu’il l’ait autant, ou plus merité que moy.

Gaz. Que V. E. cesse de s’estonner, c’est vne prudente adresse
des Parisiens qui autrement experimenteroient dans cette occasion
la verité du Prouerbe, qui dit, que trop en a, qui deux en meine.
Ce n’est pas comme ie viens de dire qu’ils ayent moins d’auersion
pour luy, que pour vous, ny qu’il en doiue attendre vn plus
fauorable succez. L’on sçait trop bien les peines qu’il prist, pour
faire trouuer bon à son Maistre le départ du Roy, en vn temps &
en vn iour, ou l’on le deuoit moins soupçonner. L’on sçait bien la
violence dont il obligea Monsieur d’exercer enuers Madame, pour
la rendre de la partie de cette belle fuitte. L’on est bien aduerty
qu’il est seul cause que son Maistre a esté plus de trois iours à S.
Germain : que connoissant la faute qu’il auoit faicte, & la breche
qu’il faisoit à son honneur, & à l’authorité du Roy, il l’a vouloit
reparer par son retour à Paris, & son assistance au Parlement, sans
les charmes de ce traistre à son Maistre & à sa patrie : & que l’on n’auroit
point veu de sang répandu, ny de brasier allumé à Charenton,
s’il n’y auoit point eu d’autre Riuiere à saint Germain, que celle
qui coule au pied du chasteau. Que Monseing. le Prince de Condé
se seroit consommé luy-mesme dans les flames interieures de
son despit, s’il n’auoit point fait rencõtre pour son rafraichissement
de cette Riuiere infernale : que c’est dans cette eau bourbeuse &
chariante des ruines des miserables, qu’vne partie des dragõs enuenimez
qui deuorent auec tant de cruauté ont pris naissance. Et pour
parler clairement, on sçait parfaictement qu’il n’y a que V. E. & luy,
qui soyez la cause de tous les maux, & de toutes les miseres de
l’Estat. Et ce qui fait l’estonnement de toutes natiõs, que les François
si subtils, si adroits & si genereux se laissent ainsi dupper par deux
personnes de la plus basse lie, & d’vne education si infame. Or comme
vous serez remis sur le chãdelier & hors des attentes des mains,
encore que vous ne le soyez iamais des cœurs ny des langues : Iugez
si tout l’orage de la colere, de la furie & de la vengeance ne
tombera pas sur ce mal-heureux ? & quel traittement il receura
d’vn peuple iustement irrité, lors qu’il sera en sa puissance, & agira
sans apprehension ? Pour moy, ie ne voudrois pas estre dans sa
peau, & si on ne dit mot pour le present ; c’est qu’on est bien asseuré
qu’il ne s’enfuira pas, & qu’il payera l’attente auec plus d’vsure