semper mendaces. Ainsi estre Roy des Cretois, est estre Roy
des menteurs, ma veritable profession. Pour le reste vous l’entendez
assez, & le chant de la foule, est celuy du Salue Regina, &
de la joye que le peuple aura de me voir finir ainsi de cette façon.
Et ce qui augmente ma peur est, que l’on m’a asseuré que
Messieurs du Parlement ont donné desia Arrest contre moy,
aussi bien que contre vostre Eminence, encore qu’ils ne l’ayent
pas publié, & qu’ils m’auroient exposé en vn tableau en Greue,
sans les prieres de mes enfans enuers quelques vns des Chefs, apres
auoir presté serment de fidelité & promis d’estre autant seruiteurs
de tout ce celebre Corps, comme i’ay tousiours esté son
mortel ennemy. De maniere que dans mon mal-heur, i’ay le bien
d’auoir cela de commun auec vostre Eminence, qu’il ne faut
pas que nous retournions jamais l’vn ny l’autre à Paris, car les femmes
executeroient vostre Arrest, & Iean Guillaume le mien.

Le Car Va, va, songe pour toy & non pas pour moy, les Parisiens
ne me tiennent pas encore, & il y aura bien des testes à bas auant
que cela arriue. Il y a trop de personnes interessées d’honneur & de
bien dans ma cause : tout Estrangér qu’on me publie, i’ay si bien
pourueu à ma seureté, que si ie vien à tomber, ma cheute sera semblable
au Dragon de l’Apocalipse, qui entraisnera auec sa queuë
dans l’abisme la troisiéme partie des estoiles & des plus brillantes
du Ciel de la France.

Gaz. Ie souhaite que vous emportiez la victoire, & que vous fassiez
la nicque à tout le monde pour vostre contentement & pour ma
seureté ; mais vous sçauez la maxime du feu President de Cheury,
que i’estime tres-excellente, qu’il faut tenir le pot de chambre &
le bassin à vn Ministre, pendant que la fortune luy rit, & lés luy verser
sur la teste au moment qu’elle luy tourne le dos. Monsieur le
Prince, vostre plus fort appuy, & celuy qui fait le plus de bruit &
plus de mal, n’est pas celuy auquel ie voudrois auoir plus de confiance
si i’estois à vostre place. Les rauages qu’il a fait exercer autour
de Paris, jusqu’à rauir l’honneur aux Damoiselles, sous pretexte
de le leur vouloir conseruer, me donneroit plus de defiance que
de seureté. S’il n’a pas fait tenir parole à Lagny. à Brie-comte-robert,
à Meudon & en tant d’autres endroits, pensez-vous qu’il
doiue vser d’vne autre maniere enuers vous ? croyez-vous qu’il ne
soit pas bien aise de faire sa paix auec le Parlement, & se remettre,
en vous sacrifiant à la fureur du Peuple, dans la bonne estime où