CONFERENCE SECRETTE
tenüe à Pontoise.
IE parle pour auoir veu & entendu toutes
ces choses ; quelqu’vn me dira aussi-tost,
que c’est en songe, & ie luy répond que
c’est ainsi que ie l’entends, ie ne dormois pourtãt
point quand i’ay fait ce songe, cela semblera d’abord
bien estrange ; mais il n’est pas impossible
qu’vn esprit agisse de toutes les manieres.
Cepandant ie me souuiens que ces iours passez
à Pontoise, estant entré dans le grand Iardin
du Chasteau, dans le dessein d’y prendre le plaisir
de la promenade, qui estoit tres-agreable se
soir-la, à cause de la serenité de l’air, & de la solitude
du lieu, où ie ne rencontrois personne, ie
fis des tours d’allée, autant qu’il en faut pour
lasser vn homme, qui ne seroit pas des plus capables
de fatiguer, dés-là ie fus bien ayse de
trouuer des sieges, comme vous le pouuez penser,
qui estoient la mis fort à propos, le long d’vn
petit taillis, pour la commodité de ceux qui sont
bien ayses de n’estre pas tousiours debout, là ie
m’assis assez doucement comme vous le pouuez
croire, de peur de me faire mal dont ie n’auois
guere enuie.
Ie ne fus pas si long-temps qu’il y a, que i’en
parle, que ie m’auisay que ie me reposerois encore
bien mieux si iestois couché tout de mon
long, chacun fait comme il l’entend, pour moy
Anonyme [1652],
LA CONFERENCE SECRETTE, TENVE A PONTOISE ENTRE LE ROY, LA REYNE, Le Cardinal Mazarin, Messieurs les Princes, & plusieurs autres Grands Seigneurs de la Cour. , français
Référence RIM : M0_745. Cote locale : B_15_3.