Cheres Prouinces desolées,
Par ces factions depeuplées :
Que par tiranniques exploits,
Il a reduittes aux abois ;
Dont il à tiré la substance,
Sous le beau nom de subsistance,
Et mangé la chair iusques aux os.
Sus Paris monstrez vous dispos ;
Champagne, Prouẽce, & Gascogne
Empoignez cette Castelogne :
Tenez bien roidissez les coings,
Y estes vous fermez les poins,
Et faites sauter iusqu’aux nuës
Par des secousses continuës,
Sans crier iamais c’est assez
N’y que vos bras en soient lassez :
Ce franc faquin a triple estage,
Qui n’est propre pour tout potage,
Qu’à faire en l’air des entrechats,
Comme l’on en voit faire aux chats :
Que toutes ses Mazarinettes,
Ses Singes, ses Marionnettes,
Et ses Bardaches auiourd’huy,
Soient secouez quant & quant luy.
Voila qui va le mieux du monde,
Bons Dieus entẽdez cõme il gronde,
Qu’elle grimace, quel portraict,
Vn constipé sur vn retraict ;
Vn vieux charlatan qui boufonne,
Vn Mulet roigneux qu’õ bouchõne :
Vn Singe qui croque des pous,
Vn Mastin assailly des Lous :
Dom-Guichotte dans les escornes,
Vn fou quand on luy fait les cornes,
Et Guillaume, en machant des noix,
Font moins de mine trente fois,
Voyez voyez, comme il escume,

Page précédent(e)

Page suivant(e)