iour heureux sois marqué d’vne pierre blanche sur du
marbre, sur du cuiure, & sur du bronze pour estre consacré
à la posterité. Beau iour qui nous produit vn
agreable Prin-temps, qui de chasse cette rude saison hiernale
qui nous a comble de tant de maux par la priuation
fatale de ce Prince tant aymable, agreable iour, qui
donné la liberté à Ceres de trauailler aussi bien qu’à
Baccus ; Heureux iour qui dissipe tous les orages, & qui
dissout la neige qui couuroit la beauté des prairies, &
qui a rauit à nos yeux vne agreable verdure. Ne faut
donc pas s’estonner si les Peuples sont en extases & rauissement
à l’aspect de ce glorieux iour, qui fait voir le
visage maiestueux de ce grand Monarque, sur lequel
Dieu a graué les traits de sa Diuinité, & imprimé dans
son ame le caractere ineffaçable de ces grandeurs.

Que maintenant toutes les Muses, preparent leur Lyre
pour chanter les loüanges de ce tres-illustre Prince
& Seigneur, & que les forests aussi bien que les ruës en
forment vn glorieux Echo. Que les Instrumens musicaux,
comme celuy d’Orphée doit attirent insensiblement
les oreilles pour écouter. Que diray-je autre chose
que les loüanges de ce grand Roy qui gouuerne les
hommes, qui par sa grandeur surpasse toutes les choses
les plus diuines de la Nature, aussi il est l’image viuante
de la Diuinité.

Entreprendray-je de décrire les effets admirables du
genereux Alcide, y adjoustans Castor & Pollux enfans
de Lede, Astres brillans & fauorables aux Nauronniers,
qui par leurs influences dissipent les orages & les tempestes
de la Mer, & appaisent la furie des Aquilons,
faisans fuyr les nuages, & cesser la rage des Ondes mutinées.
Apres quoy feray ie voir le Regne tranquille de
Pompille ; Parleray ie de Romule, des superbes & magnifiques
Haches d’armes enuironnées de trousseaux
de Verges, dont Tarquin se faisoit honorer pour marque
de son Consulat ? Representeray ie la glorieuse mort