propice ; mais Saturne l’enueloppera dans vn succez
de malheurs. Et Diane ny Phebus ne pourront le fléchir.

Cela preiuge & pronostique qu’vn méchant Ministre
d’Estat figuré par le Dragon, qui n’est autre que
Mazarin, ausa du dessous, qui sera lié auec sa queuë &
Saturne luy estant directement opposé, & alors trouué
en conionction auec Mars. Ce mauuais Politique
sera degradé & tombera dans de tres-honteux precipices.
Et partant la cause des malheurs finissant les
effets qui la suiuent cesseront, au grand contentement
de tout le monde, qui ayant esté lezé par ce Tyran,
& dépoüillé de tous ses biens, il se verra à la faueur
du temps, remis dans sa liberté premiere & comblé
de tous biens.

I’ay parcouru tous les Astres, & n’en ay reconnu
aucun qui ne presage vn succés de bonheur à la France,
aussi Dieu ne peut donner que de bonnes influences
pour retirer ce Royaume des abois où son
Tyran l’a reduit.

Mais cette diuine Prouidence a ietté ses yeux misericordieux
sur vous, Messieurs, vous a vnis tellement
par ensemble qu’on peut dire qu’vne seule ame
vous anime & que le lien de la charite qui vous tient
heureusement liez, est indissoluble, veu que plusieurs
Corps sont vnis en vn par acte de volonté. Toutes
les Nations les plus écartées publieront à iamais vos
loüanges & le party qu’auez si courageusement embrassé,
immortalisera vostre memoire, & la posterité
en conseruera le souuenir, le papier est trop foible