Et au bas est écrit : ma femme & Mademoiselle
Mal’herbe font pareille declaration que dessus,
protestans de n’auoir iamais eu dessein de rien innouer
en la tres Saincte Eglise Catholique Apostolique
& Romaine, (suiuant la particuliere soûmission
qu’ils ont aussi fait entre les mains dudit
sieur Abbé,) ains bien la maintenir ainsi que tout
bon Chrestien doit faire, & y viure & mourir ;
en foy dequoy ladite Damoiselle Mal’herbe a icy
mis son nom, les iours & an que dessus, & ma femme
a declaré ne sçauoir écrire. Ainsi signé
Marguerite Langlois, Vefue Mal’herbe.

Et en la marge est écrit. Le Lecteur remarquera
s’il luy plaist, que c’est pour la seconde fois que
mes ennemis m’accusent à faux de faire assemblée
de 30. ou quarante personnes pour conferer, n’en
ayant iamais eu n’y le dessein, ny mesme la pensée,
& ie m’estonne que leur ialousie soit si grande
en mon endroit & de ceux qui me font l’honneur
de m’aymer, que la visite de 3. ou 4. amis
au plus les oblige à former de si horribles mensonges,
& me susciter sur ce de si dures persecutions
qu’ils ont desia fait, mais Dieu leur pardon
ne, ie leur pardonne de bon cœur.

FIN.