foiblesse : mais estant impossible, que les delices passantes
produisent les eternels, il vaut mieux par vn
chemin court & pierreux estre conduit à vn festin de
nopces, que par vn beau iardin estre mené sur vn
eschafaut de supplice. Les petites ames ont peur de
l’affliction, & sont semblables au treffle, qui dresse ses
feuilles contre le Ciel, lors qu’il menace la terre de
quelque tempeste. Mais qui peut auoir la paix en
resistant à Dieu ? Releuons nos courages par ces beaux
mots de S. Gregoire Pape ; O tourmens de la misericorde
de Dieu ! il aime, & il afflige. C’est, disoit saint
Cyprian, la loüange de la foy, par l’esperance des biẽs
qui nous attendent, souffrir les maux qui se présentent.
Nous combattons vn moment pour vne couronne
eternele ; & par vne ligne courte, qui n’est qu’vn
point roulant, nous entrons dans vn cercle, duquel
on ne sortira plus, & qui est tout enuironné & remply
de felicité. Quiconque comparera tout le temps
auec l’eternité, trouuera, que celuy là n’est rien, & que
cette-cy est tout : à plus forte raison, quand nous verrons
la petite part que nous auons dans ce rien, nous
iugerons, que par vn rien de ce rien nous pouuons
gaigner le tout du tout. MARIE DE MEDICIS est
passée par le temps de soixante huict années à l’eternité ;
c’est à dire, par vn moment à vne duration
infinie : & ayant eu dans ces soixante huict années
douze fascheuses, & les autres meslées de bien & de

Page précédent(e)

Page suivant(e)