voulut qu’en retournant elle fut vuide ; s’estant
trouuée sans biens, sans suite, sans nombre de seruiteurs,
sans credit ; & aprés auoir esté errante sur les
mers & sur les terres, mourante dans vne maison de
loüage, sans estre assistée en ses derniers iours par
aucun de ses Parens. Le Serenissime Prince Electeur
de Cologne son Cousin Germain, a eu soin de faire
rendre aprés sa mort les respects que meritoit
vn corps, duquel on pourra dire vn iour, que tous
ceux des grands Princes & grandes Princesses de la
Chrestienté seront sortis. Si nostre Noëmi ou Mara ;
est sortie vuide de ce monde en la façon que nous
auons dit, elle estoit remplie de soixante-huict années,
& d’vne grande suite de petits Enfans. Ce
qui luy a esté plus vtile, est, que Dieu l’a ramenée à
soy pleine, comme Tabitha, de bonnes œuures,
d’aumosnes, de saints desirs & de merites ; qui luy
ont ouuert les portes du Ciel : où elle regne plus glorieusement
& plus paisiblement qu’elle n’a fait en
terre, qui est vn pais de trouble, de confusion, d’opinion,
de mensonge & de folie : où les Couronnes
Royalles sont des fardeaux pesans, des paniers remplis
de fruits, qui ont l’escorce douce, & les noyaux
amers. Ceux qui estiment le bon-heur de grands
par les habits & par la face, ne croyent pas, qu’ils
puissent estre mal-heureux dans le cerueau & dans
le cœur, qui sont les sieges de la vraye felicité.

Page précédent(e)

Page suivant(e)