pas dire où elle alla à la sortie des Païs-bas, mais
i’asseure, que pour passer en Angleterre elle eut des
grandes difficultez, & fut durant sept iours le iouet
des vagues & des vents, qui luy firẽt sentir sur la mer,
qu’elle pouuoit estre appellée Mara, Dieu la remplissant
sur cet element amer d’vne grande amertume
& en l’ame & au corps. Le Roy de la Grande Bretaigne
l’adoucit vn peu par la bonté qui luy est naturelle,
& par vne honnorable reception, l’ayant conduite
à la Royne sa Fille ; qui luy tesmoigna des
tendresses & des amours incroyables, cherchant auec
son bel esprit toute sorte de diuertissemens, pour
tacher de faire oublier à sa Mere ses desplaisirs. Ils
s’augmenterent par les refus qu’on fit en France de
la receuoir ; tous les traictez qu’on luy auoit voulu
faire esperer, pour la retirer des Pays-bas, ayant esté
inutiles ; rien ne pouuant asseurer celuy qui l’auoit
offensee, & qu’il ne craignoit pas tant sa vengeance
comme le bon naturel du Roy. La Royne demeura
donc en Angleterre auec vn honnorable entretien
que le Roy son Beau-fils luy donnoit, iusques à ce
que l’assemblee du Parlement menaça son Royaume
de grands troubles ; & fit cognoistre à la Royne
que les Puritains s’offensoient de la liberté qu’elle
prenoit pour l’exercice de la Religion Catholique,
que le zele de la bonne Princesse rendoit quasi
public. Elle fut donc obligee de sortir d’Angleterre

Page précédent(e)

Page suivant(e)