& eut pris la route des Païs-bas ; où on vouloit & on
fit en sorte qu’elle se retira. Elle sortit la nuit, s’estant
desguisee, & ayant dans douze ou treize heures passé
la frontiere de France. La seule consolation qu’elle
trouua fut dans l’accueil de l’Infante, Princesse sage
& sainte, qui la receut, la consola & l’assista. Nous
pouuons dire, qu’entre les plus cuisantes afflictions
de la Royne on doit mettre la mort de cette grande
Princesse, qui empeschoit que nostre affligée ne
resentit si viuement ses desplaisirs. Ils se redoublerent
par la mauuaise intelligence qui se ietta entre ses
Ministres & ceux du Duc d’Orleans : qui se portans
dans des extremitez estranges, ioüoient à Bruzelles
vne belle comedie à celuy qui fomentoit leurs querelles.
D’vn costé vn viellard ignorant & violent,
de l’autre vn ieune homme vacillant & sans experience,
vouloient conduire seuls la plus grande affaire
de la Chrestienté, pour laquelle les dix plus aduisez
hommes du monde n’eussent pas esté trop sages.
I’aduoüe que dans ce temps le feu du desir, que la
Royne auoit d’aller au centre de son repos, qui estoit
le cœur du Roy son Fils, faisoit quelques efforts, &
vouloit esbransler, & ietter en l’air quelque peu de
terre, pour courir là où la nature vouloit qu’elle fut.
Mais tout ce que ses gens entreprenoient, bien souuent
sans qu’elle en sçeut rien, estoit manié auec tant
d’imprudence, & commis à des personnes si infideles,

Page précédent(e)

Page suivant(e)