(depuis deux iours en ç’a) vouloient sortir à la
faueur de ces habits. Mais leur port, leur mine, &
leur parole, les fit bien tost reconnoistre à ceux de la
Garde de la Porte Sainct Honoré ; neantmoins ces
deux femmes apporterent toutes les circonspections
imaginables pour n’estre point découuertes.

Elles marchoient auec vn pas assez graue en apparence
d’homme, leurs chapeaux enfoncez & leurs
espées assez bien mises, & beaucoup de grossiers les
auroient prises pour homme à voir leur Physionomie
& contenance, mesme auoient passé le premier
Corps de Garde sans estre reconneuë ; mais l’vne
d’icelles ayant glissé & tombé, vn des Soldats voulant
faire du ciuil & officieux, aida à la releuer, &
ayant mis sa main sous ses aisselles, il reconnut au
mesme instant par la partie mommeuse que c’estoit
vne femme, ce qui en fit autant iuger de l’autre,
ainsi que tost apres la verité le fit reconnoistre.

Le Capitaine du Quartier les fit foüiller pour
voir si elles n’estoient point chargées de lettres, mais
estans intimidées, & ayans encore conserué quelque
pudeur, & crainte que l’insolence des Soldats
ne parut iusqu’en sa derniere extremité, c’est ce qui
les obligea à confesser d’abord qu’elles estoient chargées
d’vne lettre instructiue & pleine d’intelligence
secrettes d’vn Partisan auec Mazarin, & qu’elles
s’estoient mises en cette posture pour luy porter, &
pour obtenir de luy quelque assistance.

Cette lettre estoit cousue dans le bord du chapeau,
& pliée en si petit volume & si artistement,