sont bien intentionnez. Nous auons toûiours
passionnement souhaitté que nos Peuples, &
particulierement les Habitans de nostre bonne
ville de Paris, reconnussent que le chastiment
que nous voulions faire de ces Factieux,
ne les regarde point, & n’auons rien obmis
pour empescher qu’ils n’y prissent part, par le
seul motif de l’affection que nous leurs portons,
& non par aucune apprehension de
l’appuy, qu’ils pouuoient donner au Parlement ;
n’ayant iamais douté que d’vne façon
ou d’autre, nous ne venions à bout d’obliger
bien tost tous les Rebelles à l’obeissance qu’ils
nous doiuent : Mais nous auons veu auec
grand regret, que toutes nos diligences ont
esté inutiles & que les artifices dont ces meschans
se sont seruis pour abuser lesdits Habitans
de nostre ville de Paris, ont tellement
preualu aux bonnes intentions que nous
auons tousiours eu pour eux, qu’ils les ont
engagez à deffendre leur crime par vn autre,
leur mettant les armes à la main contre leur
Souuerain, & leur faisant croire aujourdhuy
qu’il n’y a plus de salut pour eux, que dans la
resistance qu’ils nous feront ; Nous aurions à la
verité, iuste raison de nous seruir de la puissãce
que Dieu nous a mise en main, pour chastier

Page précédent(e)

Page suivant(e)