dans les necessitez publiques, qui sont telles, que s’il n’y est
promptement remedié, nous n’auons point moyen de payer
nos gens de guerre, ny d’entretenir les garnisons des places les
plus importantes de nostre Royaume. De sorte que nous seriõs
reduits à telle extremité que nous ne pouriõs resister à la puissance
de nos ennemis, qui trouuans nostre Royaume ouuert,
sans forces pour opposer à leurs armes, y feroient tout le progrez
qu’ils entreprendrõient. Il est vray que lors que nous
nous representons la conduite de nostredite Cour de Parlement,
nous ne sçaurions voir qu’auec indignation, que des Officiers
qui n’ont autre puissance que celle que nous leur auons
dõnée, l’employent à la ruyne de nostre authorité, & que ceux
qui ont receu tant de graces de Nous, au lieu d’en avoir la reconnoissance,
par vne ingratitude qui n’a point d’exemple, trauaillent
auec dessein formé, à porter nostre Estat dãs vne ruine
asseurée. Nous aurions grand sujet de craindre que Dieu ne
nous fist ressentir les effets de sa colere, en retirant les graces &
les ben dictions qu’il a versées si heureusement sur nostre regne,
que nous pouuons dire, qu’il n’y a point eu dans les siecles
passez vne administration plus glorieuse & plus heureuse que
celle de nostre minorite, si nous ne nous seruiõs de la puissance
qu’il nous a donnée pour la conseruation de nostre Estat, &
imitant les Roys nos predecesseurs, nous ne nous opposions
aux entreprises de nostre Cour de Parlement, qui s’esleuant au
dessus du pouuoit que nous luy auons donné, se rend indigne
de celuy de la Magistrature dont les Roys nos predecesseurs &
Nous les auons honorez. Nous sçauõs bien que les plus sages
de la Compagnie sont emportez par le plus grand nombre de
ceux qui agissent par des interest ; si particuliers, qui ne sont
que trop connus Nous sommes bien informez des pratiques
& des intelligences qu’ils ont entretenus auec nos Ennemis,
& des mauuais desseins qu’ils ont eu de faire arrester nostre
Personne, publiant auec artifice, pour persuader les Habitans
de nostre bonne ville de Paris, que nous conseruons tousiours
vn ressentiment des mouuemens derniers, auec dessein de leur
en faire porter la peine, & qu’il n’y a que ce seul moyen de s’en

Page précédent(e)

Page suivant(e)