plus factieux n’y sçauroient rien trouuer à dire, ny
adiouster pour leur seureté, ny mesme desirer
qu’elle soit registrée à Paris ; dautant qu’ils sçauent
tres-bien que les Officiers de mondit Parlement
qui demeurent en ladite Ville, sont sans authorité
depuis leur interdiction ; & qu’estant en
perpetuelle apprehension de receuoir vn pareil
traittement à celuy qui s’est fait aux bourgeois &
habitans assemblez en l’Hostel de Ville, le quatriesme
de Iuillet dernier, & n’ont aucune liberté
de suffrage, ainsi tout ce qu’ils feroient ne
pourroit estre vallable selon les maximes &
loix du Royaume ; de sorte qu’ayant fait par aduance
tout ce que vous auez desiré de moy sans
condition, ne restant qu’à satisfaire de vostre part
aux paroles que vous auez donnees, l’expedition
des passeports est tout à fait hors de propos, aussi
n’en a-t’il esté fait cy-deuant instance, que pour
donner temps à des negotiations apparentes
auec le Duc de Lorraine & aux trouppes des Espagnols
commandées par le Duc de Virremberg,
de s’approcher de Paris, pour y ioindre celles du
Prince de Condé, & l’on ne les renouuelle presentement
que pour amuser le peuple & donner
lieu à vn corps de troupes detachées de celles
d’Espagne, sous le commandement du Prince de
Ligne, de s’aduancer dans le Royaume, afin de
maintenir madite ville de Paris, dans la seruitude

Page précédent(e)

Page suivant(e)