& ennemy du Roy & de l’Estat, l’autheur d’vne si
estrange tyrannie, & la cause notoire de tant de
mal-heurs, & tant pour l’execution de leur Arrest,
que pour la conseruation de la Ville de Paris, & de
leurs propres vies, employer les armes que les Rois
leur ont mis en main, pour appuyer l’execution de
leurs iugemens, afin que la force en demeure à Iustice.
Quoy, Messieurs du Parlement seront ils coupables
pour auoir tendu la main à plusieurs personnes
de marque, qu’on a longuement detenus en
prison, sans aucun suiet ? Pour auoir veu auec emotion
la calamité de ceux qui ont esté deportez &
faits mourir secretement sans forme de Iustice, pour
auoir asseuré du moins pour l’aduenir, la vie, & les
fortunes de tous ceux qui subsistent encore alencontre
d’vne si rude & si étrange façon d’agir, pour
auoir apporté allegement aux souffrances du pauure
peuple, remis le Roy en la plaine possession de
ses reuenus, & restably l’Estat chancelant de toutes
parts ? Au contraire, s’ils estoient criminels en cela,
ce seroit pour auoir trop long-temps dissimulé le
mal, comme ils ont fait pour l’honneur de la Regence :
Estant certain qu’ils ne pouuoient differer
plus long-temps d’y apporter le remede necessaire,
par vne scrupuleuse veneration de l’authorité de la
Reyne, sans se rendre coupables de la ruine de l’Estat,
& charger leur memoire d’vn honteux & éternel
reproche, d’auoir manqué au Roy & à leur Patrie,
ainsi qu’il arriuera sans doute à ces Ministres
d’Estat, qui pour des considerations lasches, & de

Page précédent(e)

Page suivant(e)