seruiteurs du Roy les plus fidelles, & qui les auoient
le mieux meritez par leurs seruices, ainsi que l’on
pourroit iustifier, par vne infinité d’exemples, qui
sont connus à tout le monde. Cette façon d’agir
auoit bien moins d’eclat, mais auoit bien plus d’effet
pour appuyer sa tyrannie.

Mais sans nous arrester dauantage sur ce qu’a
fait le Cardinal Mazarin, qui est assez connu de
tout le monde, examinons de plus prés ce qu’ont
fait Messieurs du Parlement, & voyons s’il y auoit
quelque lieu de les declarer criminels, mesmes en la
plus rigoureuse Iustice, ils se sont trouuez obligez
pour la descharge de leurs consciences, de se formaliser
de l’estrange dissipation qui se faisoit des finances
de sa Maiesté, des exactions perpetuelles,
& extraordinaires, dont le pauure peuple estoit
trauaillé depuis long temps, des pilleries dont il
estoit opprimé par les gens de guerre, du deffaut de
payement des troupes de sa Maiesté, & de la tyrannie
insupportable que le Cardinal Mazarin exerçoit
sans forme de Iustice, contre plusieurs personnes
de probité & de qualité importante : ils ont
trouué que depuis la Regence, il s’est leué des sommes,
deux & trois fois plus grandes, que sous les regnes
precedens, mesmes lors que la France n’auoit
pas de moindres guerres sur les bras, que neantmoins
l’on a laisse à diuerses fois perir des armées
entieres a faute de payement. Que l’on a rayé l’Estat
des pensions dont le feu Roy auoit gratifié les
Princes, Gentils-hommes & autres, qui auoient