merites. L’Honneur que les Roys rendent à
Dieu, est vne protestation solemnelle de leur seruitude,
& vn hommage public qu’ils font au
Roy des Roys, de leur Sceptre & de leur Couronne ;
ces actions de Religion, font beaucoup plus
d’impression sur les esprits des peuples, & les edifient
dauantage, que si elles estoient pratiquées,
par des personnes particulieres, & de fort petite
consideration. Et puis, il est bien iuste que les
Princes, ayent soin de glorifier Dieu, d’vne façon
toute speciale, par la vertu de Religion, puisque
sa Maiesté les rend si honorables dans le monde,
& qu’elle oblige leurs subiects, à les traitter
d’honneur & de gloire ?

Quand les Roys fondent leur Gouuernement,
sur les Maximes de la Religion, & qu’ils
mettent plustost leur confiance, dans le secours
du Ciel, qu’en l’industrie de la foiblesse humaine ;
Dieu ne manquera pas, de faire fleurir leurs Estats
& de prendre sous sa protection, leurs iustes desseins ;
Il tiendra leur parti dans les Combats, &
armera, s’il est besoin, les Creatures inanimeés,
contre leurs Ennemis, afin qu’ils soient tousiours
victorieux. N’a t-on pas veu IOSVE commander
au Soleil, & arrester ce beau Globe de lumiere,
pour fauoriser ses desseins ? Ne sçait-on
pas que Gedeon merita pour sa grande pieté, de
tailler en pieces, toutes les trouppes des Madianites ?
Dauid le plus Religieux Prince du monde,